2 pulis-Las Piñas na nasugatan enkwentro, tinulungan ni Vice Mayor Aguilar

Agad binisita at tinulungan ni Las Piñas City Vice Mayor April Aguilar ang dalawang nasugatang pulis ng lungsod na nagpapagaling sa Las Piñas Doctor Hospital matapos makaenkwentro at mapatay ang isang lalaking “holdaper” kamakailan.

Sinagot ni VM Aguilar ang lahat ng gastusin sa pagpapagamot nina PMSg Warren Panton at PMSg Avelino Lopez, kapwa tauhan ng Las Piñas City Police, na nagtamo ng tama ng bala.

Nagkaloob din ang bise alkalde ng karagdagang cash assistance sa dalawang pulis bilang suporta sa kanilang paggaling.

Personal na ipinaabot ni VM Aguilar ang pagkilala ito sa katapangan at dedikasyon sa tungkulin nina Panton at Lopez.

Aniya hindi matatawaran ang kabayanihan ng dalawang pulis na sumasalamin sa kanilang pangakong protektahan ng may integridad ang komunidad at nagbigay ng karangalan sa pulisya.

Sinabi pa ni VM Aguilar na binibigyang-diin nito ang importanteng pagpapatupad ng maayos at epektibong batas upang mapanatili ang kaligtasan ng publiko. (Bhelle Gamboa)