HVI nahulihan ng P680K na halaga ng shabu sa Taguig

Sa maigting na kampanya kontra ilegal na droga ng Southern Police District (SPD), isa na namang high-value individual (HVI) ang nadakip at nakumpiskahan ng 100 gramo ng umano’y shabu na nagkakahalaga ng ₱680,000 sa ikinasang buy-bust operation ng otoridad sa Taguig City nitong July 2.

Kinilala ni SPD District Director, Brigadier General Leon Victor Rosete ang suspek na si alyas Mama B, 22-anyos, isang estudyante.

Ayon sa ulat, dakong alas-8:45 ng gabi nagsagawa ng operasyon ang mga operatiba ng District Drug Enforcement Unit sa Barangay New Lower Bicutan, Taguig City na nagresulta ng pagkakaaresto ng suspek at narekober ang sinasabing ilegal na droga at buy-bust money.

Dinala ang nakumpiskang ebidensiya sa SPD Forensic Unit para isailalim sa qualitative at quantitative analysis.

Mahaharap naman sa kasong paglabag sa Comprehensive Dangerous Drugs Act of 2002 ang suspek. (Bhelle Gamboa)