Vietnamese na nagwala sa NAIA inaresto ng BI

Inaresto ng mga tauhan ng Bureau of Immigration (BI) ang babaeng Vietnamese makaraang magwala ito sa Ninoy Aquino International Airport (NAIA) terminal 3.

Kinilala ang dayuhan na si Ban Thi Van, 19-anyos na aalis sana ng bansa patungong Hanoi, Vietnam sakay ng Cebu Pacific.

Ayon sa BI, pagdating sa Immigration counter ay iprinisinta ng dayuhan ang kaniyang pasaporte para sa immigration clearance.

Habang tinitignan ng immigration officer ang kaniyang passport ay bigla itong hinablot ng dayuhan, nagsisigaw at naglumpasay sa sahig.

Agad namang nagpadala ng mga babaeng tauhan ng Philippine National Police (PNP) aviation security group para pakalmahin ang dayuhan.

Dinala sa head office ng BI ang babaeng dayuhan at isinailalim sa inquest proceedings bago ilipat sa Camp Bagong Diwa sa Taguig habang naghihintay ng deportation. (DDC)