SILG inaalam kung ‘private escorts’ ang SWAT personnel sa networking company event sa Pasig City

Nakarating kay Department of the Interior and Local Government (DILG) ang mga ulat kaugnay sa presensiya ng mga tauhan ng Special Weapons and Tactics (SWAT) ng Batangas sa kasagsagan ng paglulunsad ng isang networking company na idinaos sa Pasig City kamakailan.

” I have received reports concerning the presence of Special Weapons and Tactics (SWAT) Team of Batangas during the soft-launching of a networking company recently held in Pasig City,” saad sa kalatas ng kalihim.

Nakita na ni Sec. Abalos ang mga litrato ng mga miyembro ng nasabing Team na ipinadala sa kanyang opisina na nagpapakita na nakasuot ng kani-kanilang uniporme habang ang ilan ay may bitbit pang mga baril.

“Nag-isyu na ako ng direktiba sa Hepe ng Philippine National Police para agarang imbestigahan ito. Aasahan ko ang ulat ng PNP sa lalong madaling panahon,” ani Abalos.

Hindi aniya kukunsintihin ng DILG ang deployment ng ating mga pulis bilang private escorts o para sa pampribadong mga pakay.

“Rest assured that, under my watch, our police force is and will remain laser-focused on their legal mandate to ensure peace and order,” diin ni Abalos. (Bhelle Gamboa)