Pinay na ilegal na magtatrabaho sa Lebanon, naharang ng BI

Naharang ng mga tauhan ng Bureau of Immigration (BI) ang isang Pinay na nagtangkang umalis ng bansa patungong Lebanon.

Ayon kay Immigration Commissioner Norman Tansincgo, naharang ang Pinay sa Ninoy Aquino International Airport (NAIA) Terminal 1 na sasakay dapat sa flight ng PAL patungong Thailand.

Ayon sa report ng immigration protection and border enforcement section (I-PROBES) hindi pinayagang makalabas ng bansa ang 57-anyos na babae.

Sa panayam ng I-PROBES personnel sa babae, una nitong sinabi na bibiyahe siya patungong Thailand bilang turista.

Pero kalaunan ay inamin din nito na magtutungo siya sa Lebanon.

Inamin din niyang peke ang mga dala niyang travel documents na galing sa kaniyang recruiter na nakilala lamang niya sa Facebook Messenger.

Paalala ng BI sa publiko, iwasang makipagtransaksyon sa mga nakikilala lamang sa social media. (DDC)