5 alien pedophiles, hinarang na pumasok sa bansa
Naharang ng mga opisyal ng Bureau of Immigration at hindi pinayagang pumasok ng bansa ang apat na Americans at isang Briton na pawang sex offenders.
Sinabi ni Immigration Commissioner Norman Tansingco na ang apat na pedopilya ay naharang sa Ninoy Aquino International Airport (NAIA) habang sa Mactan-Cebu International Airport (MCIA) naman ang isa pa.
Ayon pa kay Tansingco ang naturang mga pasahero ay pawang registered sex offenders (RSO) dahil may records na nahatulan ng sex offenses sa kanilang bansa.
“They were already included in our blacklist, thus they are perpetually barred from entering the Philippines,” dugtong ng BI chief.
“They were denied entry as their presence here could pose a serious risk to our women and children.”
Kamakailan ay inilunsad ng BI ang kanyang Project #Shieldkids Campaign na agresibong tuntunin, arestuhin at ideport ang mga dayuhang sex offenders na maaaring nasa ating bansa. (Bhelle Gamboa)
