Graduates ng LPCNSH-Doña Josefa Campus kinilala at pinuri ni VM Aguilar
Personal na ipinaabot ni Las Piñas City Vice Mayor April Aguilar ang pagkilala at pinuri nito ang mga nagsipagtapos mula sa Las Piñas City National Senior High School – Doña Josefa Campus sa idinaos nitong 7th Commencement Exercises sa SM Southmall Events Hall.
Ikinatuwa ni VM Aguilar ang mga tagumpay sa akademiko ng mga nagsipagtapos na estudyante sa naturang paaralan.
Sa nasabing seremonya tampok ang paggawad ng Mayor Nene Aguilar Academic Excellence Award na mismong si VM Aguilar ang nagkaloob sa mga graduates na nagkamit ng pinakamahuhusay sa akademiko.
Ang award na ito ay ipinangalan sa yumaong alkalde, Mayor Vergel “Nene” Aguilar, para kilalanin ang mga estudyanteng nagpamalas ng kanilang hindi matatawarang dedikasyon at nag-aral ng mabuti.
Sa kanyang talumpati,malugod na binati ng bise alkalde ang mga nagsipagtapos para sa kanilang ipinamalas na pagsusumikap at sigasig.
Binigyang-diin ni VM Aguilar ang kahalagahan ng edukasyon tungo sa pagkakamit magandang kinabukasan.
Hinikayat din nito ang mga estudyante na ipagpatuloy ang kanilang pagpupunyagi upang maging mahusay sa akademiko at magkaroon ng magandang buhay.
Sa isang video message, ipinaabot naman ni Mayor Imelda T. Aguilar ang kanyang malugod na pagbati sa mga graduates at binigyang-diin ang pangako ng Pamahalaang Lungsod na suporta at pagkilala sa academic excellence.
Mahalaga ang pagdalo sa okasyon ng mga nasisiyahang magulang, opisyales ng lokal na pamahalaan at panauhin para kilalanin ang tagumpay ng mga graduates.
Naging maayos ang seremonya na nagtapos sa presentasyon ng mga diploma at espesyal na parangal sa mga estudyante para sa mahalagang yugto ng kanilang pag-aaral. (Bhelle Gamboa)
