Driver patay sa ‘road rage’ malapit sa Ayala Tunnel sa Makati City

Dahil sa umano’y away trapiko, patay ang isang lalaking driver matapos pagbabarilin ng hindi pa kilalang suspek na sakay ng isang sasakyan malapit sa Ayala Southbound tunnel sa Barangay Urdaneta, Makati City dakong alas-2:30 ng hapon ngayong Martes,May 28.

Dead on-the-spot ang isang lalaki na tinatayang 45 hanggang 50-anyos, driver ng puting Toyota Innova na may plakang NCV – 5421.

Patuloy pang inaalam ng otoridad ang pagkakakilanlan ng suspek na sakay ng Sedan, na sinasabing bumaril sa biktima.

Ayon sa inisyal na ulat ni Major Anthony Bagsik, Ayala Substation Commander ng Makati City Police, batay sa pahayag ng mga saksi, ang biktima at suspek ay parehong binabagtas ang Kalayaan Fly-Over Southbound patungong EDSA Southbound sa Brgy. Urdaneta nang magkaroon umano ng matinding pagtatalo sa trapiko.

Sa galit umano ng suspek ay bumunot ito ng hindi pa batid na kalibre ng baril at pinagbabaril ang biktima na nagresulta ng pagkamatay nito.

Samantala agad itinurn over ng MMDA sa pulisya ang cctv footage kaugnay sa nangyaring insidente sa Ayala para gamitin ito sa imbestigasyon at posibleng matukoy ang pagkakakilanlan ng suspek. (Bhelle Gamboa)