3 suspek arestado sa Muntinlupa City drug bust
Tatlong suspek ang inaresto ng otoridad matapos umanong makumpiskahan ng ilegal na droga na nagkakahalaga ng ₱108,800 sa ikinasang buy-bust operation sa Muntinlupa City ngayong Miyerkules, May 22.
Ang mga suspek na sina alyas “Joey”, 35-anyos; alyas “Koko”, 31-anyos; at alyas “Baldo”, 32-anyos, ay naaresto ng mga tauhan ng Muntinlupa City Police Station Drug Enforcement Unit sa Baywalk, Barangay Bayanan dakong alas-3:10 ng madaling araw.
Nakumpiska ang tinatayang 16 gramo ng umano’y shabu at buy-bust money.
Inihahanda na ng otoridad ang pagsasampa ng kasong paglabag sa Comprehensive Dangerous Drugs Act of 2002 (RA 9165) laban sa mga suspek. (Bhelle Gamboa)
