SSS tiniyak ang mabilis na pagproseso ng claims ng mga naulilang pamilya ng 3 OFW na nasawi sa pagbaha sa Dubai
TITLE: SSS tiniyak ang mabilis na pagproseso ng claims ng mga naulilang pamilya ng 3 OFW na nasawi sa pagbaha sa Dubai
Makatatanggap ng benepisyo mula sa
Social Security System (SSS) ang pamilya ng tatlong overseas Filipino workers (OFWs) sa Dubai na nasawi matapos ang naranasang pagbaha sa United Arab Emirates (UAE).
Ayon kay SSS President and Chief Executive Officer Rolando Ledesma Macasaet, binisita ng mga tauhan ng SSS sa kanilang branch offices sa Pampanga, Tuguegarao, at Cebu ang mga naulila ng mga OFW na sina Jenny Gamboa, Marjorie Saquing-Ancheta at Dante Casipong.
Ito ay para sa mabilis na pagproseso ng funeral at death benefit claims.
Tiniyak ni Macasaet na tutulungan ng SSS ang mga naulila ng tatlong OFWs para sa kanilang benefit claim.
Tiniyak ni Macasaet ang patuloy na pakikipag-ugnayan ng kanilang mga tauhan sa mga naulila, hanggang sa matanggap nila ang karampatang benepisyo. (DDC)
