MRT-3 stations na malapit sa pick-up at drop-off points ng EDSA Bus Carousel mananatiling bukas sa Holy Week para madaanan ng mga pasahero

Kahit walang biyahe ang mga tren ng MRT-3 sa Holy Week ay buksan pa rin ang mga istasyon nito na malapit sa pick-up at drop-off points ng EDSA Bus Carousel.

Ito ay para madaanan pa rin ng mga pasaherong sasakay sa mga bumibiyaheng bus.

Ang mga istasyon na mananatiling accessible sa mga pasahero ng EDSA Bus Carousel ay ang: Quezon Avenue Station, Santolan Station, Ortigas Station, Guadalupe Station, at Buendia Station.

Pinapayuhan ang mga pasahero na gumamit ng alternatibong mga transportasyon, gaya ng EDSA Bus Carousel, sa darating na Semana Santa.

Una ng inanunsyo ng MRT-3 na ititigil ang operasyon ng kanilang mga tren mula Marso 28 hanggang Marso 31 upang magbigay-daan sa taunang Holy Week maintenance activities ng rail line.

Magbabalik naman ang regular na operasyon ng MRT-3 sa Abril 1. (DDC)