Las Piñas City ginawaran ng Outstanding Job Fair Placement award mula sa DOLE

Kinilala at pinarangalan ng Department of Labor and Employment-National Capital Region (DOLE-NCR) ang Las Piñas City sa pagtataguyod at pagmomonitor ng maayos at epektibong job fairs na nagbigay ng mahalagang kontribusyon upang tumaas ang empleyo sa Metro Manila para sa taon 2023.

Sa ginanap na simpleng seremonya, malugod na tinanggap ni Vice Mayor April Aguilar ang parangal ng DOLE-NCR para sa Las Piñas City sa pamamagitan ng Public Employment Service Office (PESO), na Bracket 3 ng Best Job Fair Placement category ng 2023 Best Performing PESO awards.

Ipinagmalaki naman ni Vice Mayor Aguilar ang award na ito na nagbigay karangalan sa Las Piñas City dahil kinikilala nito ang mga hakbang at pangako ng lokal na pamahalaan sa pagpapaangat ng antas ng oportunidad sa trabaho para sa mga residente ng lungsod.

Pinuri rin ng bise-alkalde ang pagtutulungan ng mga departamento ng Pamahalaang Lungsod para sa pangkalahatang kaunlaran at paglago ng Las Piñas.

Samantala sa lingguhang seremonya ng pagtataas ng watawat ng bansa sa bisinidad ng Las Piñas City Hall ay nagsagawa naman ng espesyal na pagtatanghal mula sa Office of the City Veterinarian at City Agriculture Office. (Bhelle Gamboa)