Bagong talagang opisyales sa Las Piñas winelcome ni Vice Mayor Aguilar

Malugod na tinanggap ni Las Piñas City Vice Mayor April Aguilar ang mga bagong talagang opisyal sa lungsod, matapos pangunahan ang idinaos na lingguhang seremonya ng pagtataas ng bandila ng bansa sa city hall grounds kahapon.

Nagkaroon ng oportunidad ang lokal na pamahalaan na kilalanin ang mga bagong opisyales sa lungsod na sina Patrick John D. Megia bilang Director ng Department of the Interior and Local Government (DILG) sa Las Piñas at PCol. Sandro Jay D. Tafalla, na bagong talagang hepe ng Las Piñas City Police Station.

Ang pagkakatalaga ng dalawang opisyal sa lungsod ay pahiwatig ng pagpapalakas sa mga kasalukuyang hakbang ng Las Piñas sa larangan ng administratibo at seguridad para sa pagsiguro ng pamamahala at mas ligtas na mga komunidad.

Bukod dito, winelcome din ni VM Aguilar si Dr. Melody P. Cruz, CESO VI bilang bagong talagang Assistant Schools Division Superintendent.

Nagsagawa rin ang Department of Education ng isang simpleng turnover ceremony para sa mga bagong sasakyan na gagamitin ng Schools Division Office.

Ang flag raising ceremony at mga pagkilala ay hindi lamang nagsilbing pormal na simula ng linggong mga aktibidad ng Pamahalaang Lungsod kundi muling pagpapatibay ng mga opisyal ng lokal sa kanilang pananagutan sa serbisyo publiko.

Nagpapatuloy ang Las Piñas LGU sa pagpaprayoridad sa epektibong pamamahala at pakikipag-ugnayan sa komunidad tungo sa matatag na kaunlaran at paglago. (Bhelle Gamboa)