P680K na halaga ng shabu nakumpiska; 4 suspek arestado sa Taguig

Apat na suspek kabilang ang isang high-value individual (HVI) ang naaresto ng mga operatiba ng Southern Police District Drug Enforcement Unit, katuwang ang Philippine Drug Enforce Agency (PDEA) at Taguig City Police Sub Station 9.

Nakumpiska sa mga suspek ang P680,000 na halaga ng umano’y shabu sa ikinasang buy-bust operation sa nasabing lungsod.

Arestado ang mga suspek na sina alyas Burong, 23-anyos; alyas Bon, 28- anyos; alyas Sarah, 27-anyos; at alyas Juday, 43-anyos sa Reyes Street, Road 3 Purok 3, Barangay New Lower Bicutan.

Nakumpiska ng otoridad ang 100 gramo ng ‘shabu’, buy-bust money at dalawang cellphone.

Nahaharap sa kasong paglabag sa Comprehensive Dangerous Drugs Act of 2002 ang mga suspek.

Siniguro naman ni SPD Director Brigadier General Mark D. Pespes, na magpapatuloy ang mas pinaigting na kampanya kontra ilegal na droga sa mga nasasakupan nitong lungsod. (Bhelle Gamboa)