Pasahero nahulihan ng baril sa Borongan Airport
Nakumpiska ng mga tauhan ng Office for Transportation Security (OTS) ang tangkang pagpupuslit ng baril sa Borongan Airport.
Isinailalim sa screening ang bagahe ng isang pasahero at doon nakita ng Security Screening Officers ang caliber 45 na baril na mayroong 7 bala.
Patungo sana ang pasahero sa Cebu lulan ng Philippine Airlines.
Sa imbestigasyon ng PNP Aviation Security Unit, expired na ang lisensya ng baril ng pasahero at bigo din itong magpakita ng transport permits.
Dahil dito agad kinumpiska ang armas at isinailalim ang pasahero sa custodial investigation. (DDC)
