Mag live-in partner arestado matapos mahulihan ng mahigit P1M na halaga ng shabu sa Rodriguez, Rizal
Inaresto ng mga tauhan ng Rodriguez Municipal Drug Enforcement Team (MDET) ang mag live-in partner na kapwa tulak ng ipinagbabawal na gamot sa Rodriguez, Rizal.
Ayon sa ulat ng Rizal Police Provincial Office, ikinasa ng mga otoridad ang buy-bust operation laban sa dalawang suspek sa Brgy. Balite.
Kinilala ang mga nadakip na si Alyas Karyo, 43-anyos at ka-live in nito na si Alyas Edelyn, 34-anyos.
Nakuha mula sa kanila ang sampung pakete at 1 na nakataling ice bag na may lamang hinihinalang shabu na nagkakahalaga ng mahigit isang milyong piso.
Na-recover din ang dalawang piraso ng P1,000 na ginamit bilang buy-bust money.
Dinala ang mga nakumpiskang ebidensya sa Rizal Provincial Forensic Unit para sa dokumentasyon.
Kasalukuyan namang nakapiit ang mga suspek sa Rodriguez Custodial Facility na nahaharap sa reklamong paglabag sa R.A 9165 o Comprehensive Dangerous Drugs Act of 2002. (DDC)
