Lider ng kilabot na criminal group, 1 pa patay sa enkwentro sa Parañaque

Dalawa ang patay kabilang ang itinuturong lider ng notoryus Concepcion Criminal Gang at Regional Most Wanted Person sa Ligao City, Albay matapos umanong manlaban sa otoridad na magsisilbi ng warrants of arrest laban sa suspek sa Parañaque City.

Agad binawian ng buhay si Gilbert Saysay Concepcion, tumatayong lider ng nasabing criminal gang, sanhi ng tinamong tama ng bala sa iba’t ibang bahagi ng katawan, at isang hindi pa kilalang kasama nito.

Batay sa report, sisilbihan sana ng warrant of arrest si Concepcion ng mga operatiba ng National Capital Region Police Office, Southern Police District, Parañaque City Police, Albay Provincial Police Office, Camarines Sur 2nd PMFC, TOG5 at DID nang mauwi ito sa enkwentro at nagresulta ng agarang pagkamatay ng suspek at kasama nito sa Sitio De Asis, Barangay San Martin de Porres, Parañaque City.

Lumilitaw sa imbestigasyon ng otoridad na si Concepcion ay may standing warrants of arrest para sa 2 counts kidnapping with murder sa Ligao City, Albay, kidnapping at serious illegal detention, murder, dalawang bilang ng direct assault at kasong rape.

Nabatid na si Concepcion ay tinaguriang DILG’s Most Wanted Person na may reward na P420,000 para sa kanyang pagkakaaresto.

Ang Concepcion Criminal Gang ay sangkot umano sa gun-for-hire, extortion, pagpatay at panghoholdap sa Albay, Camarines Sur at karatig lugar.

Patuloy ang isinasagawang imbestigasyon ng otoridad sa insidente. (Bhelle Gamboa)