P544K shabu nakumpiska sa Taguig City, 3 suspek timbog

Aabot sa ₱544,000 na halaga ng umano’y shabu ang nakumpiska ng otoridad at naaresto ang tatlong suspek sa isinagawang buy-bust operation sa Taguig City.

Ang mga naarestong suspek ay sina alyas Nicky (HVI-pusher), 37-anyos, junkshop helper; alyas Allan, 51-anyos, construction worker; at alyas Dencio, 35-anyos.

Ayon sa ulat ng Southern Police District, dakong alas-6:00 ng gabi ng January 22 ikinasa ng mga tauhan ng SPD Drug Enforcement Unit , DID, DMFB, PDEA-SDO, at Taguig City Police Sub-Station 10 ang buy-bust operation sa Brgy. Bagumbayan sa lungsod na nagresulta ng pagkakaaresto ng tatlong suspek.

Nakumpiska mula sa mga suspek ang tinatayang 80 gramo ng ‘shabu’, buy-bust money at cellphone.

Itinurn over ang mga nakumpiskang ebidensiya sa SPD Forensic Unit para sa kaukulang pagsusuri.

Inihahanda na ng otoridad ang pagsasampa ng kasong paglabag sa RA 9165 (Comprehensive Dangerous Drugs Act of 2002) laban sa mga suspek. (Bhelle Gamboa)