1 patay sa pamamaril sa Pasay

Patay ang isang lalaki habang sugatan ang kainuman nito matapos silang pagbabarilin ng tatlong suspek sa Pasay City.

Dead on arrival sa Pasay City General Hospital ang biktima na si Ron-ron Uy y Perez, alyas Badboy, 36-anyos, ng No. 2445 Decena St., Barangay 94 sa nasabing lungsod, sanhi ng maraming tama ng bala sa iba’t ibang bahagi ng katawan.

Nilalapatan ng lunas sa naturang pagamutan ang kainuman ng biktima na si Jayson Ortez y Raymundo, alyas Atong, 39-anyos, ng Tuazon Mejia Compound, Las Piñas City, na nagtamo ng tama ng bala sa kaliwang balikat.

Inaalam pa ng otoridad ang pagkakakilanlan ng tatlong gunmen na agad tumakas matapos ang insidente.

Sa ulat ng Pasay City Police, naganap ang pamamaril sa harapan ng bahay sa No. 2465 Decena St., Brgy. 94.

Ayon sa inisyal na imbestigasyon, nag-iinuman sina Uy at Ortez nang biglang dumating ang mga suspek na armado ng hindi pa batid na kalibreng baril at agad pinagbabaril ang mga biktima.

Mabilis na tumakas ang mga suspek sa hindi matukoy na lugar matapos ang pamamaril.

Kaagad na dinala ang dalawang viktima sa nabanggit na pagamutan subalit binawian ng buhay si Uy.

Nagsasagawa ng masusing imbestigasyon ang otoridad sa naturang kaso. (Bhelle Gamboa)