Balitang magpapatupad ng half-working day sa Dec. 22 peke ayon sa Malakanyang

Peke ang kumakalat na balita na nagdeklara ng half-working day sa buong bansa ang Palasyo ng Malakanyang sa araw ng Biyernes (Dec. 22).

Sa kumakalat na kopya ng pekeng proklamasyon nakasaad na nadeklara ng half-working day ang Malakanyang bukas, Dec. 22 dahil sa inaasahang matinding pagsisikip sa daloy ng traffic.

Dahil ang nasabing dokumento ay ibinahagi ng isa ring opisyal ng gobyerno, iniulat na ito ng mainstream media ay nailabas na sa publiko.

Ayon sa pahayag na ibinahagi sa Facebook page ng Official Gazette, edited ang nasabing dokumento.

Wala umanong ganitong deklarasyon ang Palasyo ng Malakanyang.

Pinayuhan ng Malakanyang ang publiko na kumuha lamang ng impormasyon mula sa lehitimong government sources para maiwasan ang pagbahagi ng mga hindi beripikadong content. (DDC)