Masikip na daloy ng traffic sa NLEX sa Dec. 14 aasahan dahil sa 2023 Asia Artist Awards

Aasahan ang masikip na daloy ng traffic sa bahagi ng North Luzon Expressway sa Huwebes (Dec. 14).

Ito ay dahil sa idaraos na 2023 Asia Artist Awards sa Philippine Arena.

Ayon sa abiso ng NLEX, magsisimula ang preparasyon para sa event alas 8:00 ng umaga at tatagal ang aktibidad hanggang alas 10:00 ng gabi.

Dahil dito, maaring makaranas ng masikip na daloy ng traffic sa nasabing kalsada.

Pinapayuhan ang mga motorista na patungo sa Bocaue at Santa Maria, Bulacan na gumamit ng alternatibong ruta.

Maaari silang dumaan sa Marilao, Bocaue at Tambubong exits.

Tiniyak naman ng NLEX na magtatalaga na sapat na bilang ng traffic personnel para asistihan ang mga motorista. (DDC)