Kumpanya na may-ari ng naaksidenteng bus sa Antique tiniyak ang pakikipagtulungan sa imbestigasyon
Kumpanya na may-ari ng naaksidenteng bus sa Antique tiniyak ang pakikipagtulungan sa imbestigasyon
Tiniyak ng Vallacar Transit Inc. (VTI) ang pakikipagtulungan sa mga otoridad aksidenteng kinasangkutan ng kanilang pampasaherong bus sa Antique.
Ayon sa pahayag ng kumpanya, sangkot sa aksidente ang Ceres Bus na mayroong Bus Number 6289 na biyaheng Culasi, Antique galing Iloilo.
Sinabi ng VTI na agad nilang ipinarating sa Land Transportation and Franchising and Regulatory Board (LTFRB) ang nangyari at siniguro ang pakikipagtulungan sa imbestigasyon.
Boluntaryo na ding sinuspinde ng kumpanya ang operasyon ng 12 bus units nito na nasa ilalim ng sangkot na prangkisa kasama na ang naaksidenteng bus.
Siniguro din ng VTI na ipagkakaloob ang karampatang tulong-pinansyal sa mga pasahero at sa kanilang pamilya.
Sasagutin din ng kumpanya ang medical at burial expenses ng mga nasugatan at nasawi.
Nagtalaga na ang management ng VTI ng mga tauhan nila sa ospital kung saan mayroong ginagamot na pasahero. (DDC)
