DSWD pinag-iingat ang publiko sa pekeng Facebook page na nag-aalok ng “full scholarship”

Pinag-iingat ng Department of Social Welfare and Development (DSWD) ang publiko lalo na ang mga estudyante sa pekeng Facebook page gamit ang pangalang “DSWD CASH Assistance”.

Ayon sa ahensya, ang page na ito ay hindi opisyal na Facebook page ng DSWD at walang kaugnayan sa kagawaran.

Ang naturang page ay gumagamit ng pangalan ng DSWD nang walang pahintulot at nagpapakalat ng mga misleading content patungkol sa programa at serbisyo ng kagawaran pati na rin ng ibang ahensya.

Paalala ng kagawaran, huwag mag-click ng kahit na anumang link na ipinapadala sa messenger na hindi galing sa official Facebook page ng DSWD.

Dapat ding kilatising mabuti at i-verify muna ang mga nababasa online. (DDC)