Sunog sumiklab sa 4th floor ng Pasig City Hall

Nasuspinde ang operasyon sa Pasig City Hall matapos ang sunog na sumiklab sa ikaapat na palapag ng gusali.

Ayon sa Pasig City Public Information Office, mabot lang sa unang alarma ang sunog umaga ng Huwebes (Nov. 23) at agad din namang naapula.

Pero dahil sa naiwang usok sa loob ng gusali ay sinuspinde na ang operasyon sa City Hall.

Nag-abiso din ang Pasig City PIO na ang kanilang Emergency Hotline Number na 86430000 ay pansamantalang hindi matatawagan.

Nagdulot kasi ng pagkawala ng suplay ng kuryente sa City Hall ang naganap na sunog. (DDC)