No.6 Most Wanted Person sa Las Piñas, arestado

Bumagsak sa kamay ng otoridad ang isang lalaking akusado na tinaguriang Top 6 Most Wanted Person sa Las Piñas City kahapon.

Kinilala ni Southern Police District (SPD) Officer -in-Charge, Brigadier General Mark Pespes ang naarestong akusado na si Zaldy De Leon, 39-anyos, may nakabinbin na warrant of arrest para sa kasong paglabag sa Comprehensive Dangerous Drugs Act of 2002 o RA 9165.

Naaresto si De Leon ng mga tauhan ng Warrant and Subpoena Section at Station Intelligence Section ng Las Piñas City Police sa Cleanville Compound sa Barangay Manuyo Uno, dakong alas-4:00 ng hapon nitong Lunes, November 20.

Hindi na nagawang pumalag ng akusado nang isilbi ng otoridad ang warrant na inisyu ni Las Piñas City Regional Trial Court Branch 200 Presiding Judge Anne Beatrice Aguana Balmaceda of Regional Trial Court Branch 200 na may petsang October 13, 2023 para sa serbisyo ng sentensiya ni De Leon.

Nakakulong ngayon ang akusado sa Custodial Facility ng pulisya habang hinihintay ang kautusan mula sa nasabing korte. (Bhelle Gamboa)