Nawawalang mangingisda sa Oriental Mindoro patuloy na pinaghahanap

Nagpapatuloy ang paghahanap ng Philippine Coast Guard (PCG) sa nawawalang mangingisda sa Barangay San Jose, Roxas, Oriental Mindoro.

Ayon sa ulat ni Liezel Yap sa PCG, ang kaniyang asawa na si Ritzie Yap ay hindi na nakabalik matapos na pumalaot noong November 18 para mangisda.

Agad nagsagawa ng paghahanap sa baybayin ng Roxas at sa Sitio Dalahican ang mga otoridad.

Sinuyod na din ng PCG ang katubigan ng Mansalay at Bulalacao subalit hindi nakita si Yap.

Hinimok din ang mga residente na agad i-report sa PCG kung sakaling makita nila ang nawawalang mangingisda.

Paalala ng PCG sa mga mangingisda sa lugar, ipagpaliban na ang paglalayag kapag hindi maganda ang lagay ng panahon. (DDC)