Nasawi sa lindol sa Mindanao umakyat na sa 9 ayon sa NDRRMC

Umakyat na sa siyam ang bilang ng mga nasawi sa tumamang 6.8 magnitude na lindol sa Davao Occidental noong Biyernes.

Sa datos mula sa National Disaster Risk Reduction and Management Council (NDRRMC), 8 sa mga nasawi ay mula sa Soccsksargen, at 1 mula sa Davao Region.

Nakapagtala din ang NDRRMC ng 15 nasugatan dahil sa malakas na lindol.

Ayon sa NDRRMC, umabot na sa 12,885 na katao o mahigit 2,400 na pamilya ang naapektuhan ng lindol sa dalawang rehiyon.

Umabot din sa 826 ang naitalang nasirang bahay, 729 dito ang partially damaged habang 97 naman ang totally damaged.

Ayon sa NDRRMC, nakapaglaan na ang gobyerno ng mahigit P11.6 million na tulong sa mga naapektuhang pamilya. (DDC)