P1.6M na halaga ng ecstasy nakumpiska sa NAIA

Naharang ng tauhan ng Bureau of Customs-Ninoy Aquino International Airport (BOC-NAIA) ang isang kargamento na naglalaman ng illegal na droga.

Ang inbound express cargo ay natuklasan sa DHL Express Gateway Warehouse sa NAIA na idineklarang naglalaman ng vitamins, supplements, baby wash at body wash.

Pero dahil kahina-hinala ang kargamento, isinailalim ito sa 100% physical examination at doon natuklasan ang 995 na piraso ng dark gray tablets at broken tablets ng ecstasy.

Ayon sa BOC, tinatayang aabot sa P1,691,500 ang halaga ng ilegal na droga.

Nagsasagawa na ng imbestigasyon ang mga otoridad sa shipper at consignee ng nasabing cargo. (DDC)