4 na Pinoy seafarers sugatan sa Russian missile attack
Kinumpirma ng Department of Migrant Workers (DMW)) na mayroong apat na Filipino seafarers ang nasugatan sa Russian missile attack sa isang Liberian-flagged ship na Kmax Ruler habang ito ay naka-angkla sa port of Pivdennyi malapit sa Odessa, Ukraine.
Ayon kay Department of Migrant Workers (DMW) Officer-in-Charge Hans Leo J. Cacdac, ang mga nasugatang Pinoy crew ay kinabibilangan ng ship’s Captain, Able Seaman, Deck Cadet, at Ship’s Electrician (ETR).
Sinabi naman ni Cacdac na maayo na sa panganib ang mga Pinoy at hindi delikado ang kanilang natamong sugat.
Ang Filipino Captain, Able Seaman, at Deck Cadet ay pawang nagtamo ng minor injuries.
Habang ang Pinoy na electrician ay nagtamo ng bali sa kaniyang kaliwang kamay at kinailangang dalhin sa ospital.
Inatasan na ng DMW ang manning agency ng mga seafarer at ang shipowner na ibigay ang karampatang tulong sa mga nasugatang crew. (DDC)
