Lalaking naagawan ng cellphone sa Las Piñas City, naagaw naman ang motorsiklong gamit ng snatcher

Isang lalaki na nahablutan ng cellphone sa Alabang-Zapote Road sa Las Piñas City ang nagawanang makipagbuno sa suspek dahilan para maagaw naman niya ang motorsiklong gamit nito.

Sa video na ibinahagi sa Facebook ni Las Piñas City Police chief Col. Jaime Santos, ikinuwento nito ang pangyayari na aniya ay madalas sa Tiktok lang niya napapanood.

Ayon kay Santos, dumulog sa kanila ang biktima matapos na maagawan ng cellphone ng Oppo na nagkakahalaga ng P10,000.

Nagawa ng biktima na makipagbuno sa suspek dahilan para makuha niya ang susi ng motorsiklo.

Nanakbo na lamang ang suspek para tumakas, habang tinangay naman ng biktima ang motorsiklo nito.

May nakitang ID sa motorsiklo ng suspek na nagsasabing ito ay taga-Cavite na magagamit ng pulisya sa follow-up operations. (DDC)