Lalaking umawat lang sa away, patay sa pamamaril ng pulis sa Pasay

Isang pulis ang tinutugis ng kanyang mga kabaro matapos barilin at mapatay ang umawat na lalaking kapatid ng kanyang kinakasama sa Pasay City ngayong October 26.

Dead on arrival sa San Juan De Dios Hospital ang biktimang si Ramon Teves y Salumbides, 33-anyos, freelancer, residente sa 20 Bac 1-11, Don Carlos Village, Barangay 190, Pasay City, sanhi ng tama ng bala sa dibdib.

Samantala nakaligtas naman sa pamamaril ang kapatid nitong si Given Teves y Salumbides, 41-anyos, freelancer, at live-in partner ng suspek.

Nagsasagawa ng manhunt operation ang mga tauhan ng Pasay City Police laban sa suspek na kinilalang si SSg Ruel Lacuesta, 45-anyos, ng Block 1 Lot 4 PLC Magdaong Drive Poblacion, Muntinlupa City, at nakatalaga sa RPHAS, National Capital Region Police Office (NCRPO) sa ilalim ng JLC Schooling.

Ayon sa inisyal na report,dakong ala-1:00 ng madaling araw nagtungo ang suspek na si SSg Lacuesta sa bahay ng kinakasamang si Given sa Bac 1-11, Don Carlos Village, Brgy 190, Pasay City.

Nagkaroon umano ng pagtatalo ang dalawa dahil nakikipaghiwalay umano ang babae sa naturang pulis.

Dito umano nagalit ang suspek kaya bumunot ng baril at pinaputukan si Given na masuwerteng kaagad nakadapa at hindi tinamaan.

Umawat umano si Ramon sa away ng maglive-in partner kaya siya pinagbalingang barilin sa dibdib.

Naisugod pa sa pagamutan ang biktima subalit binawian ng buhay kalaunan.

Mabilis na tumakas ang suspek matapos ang pamamaril. (Bhelle Gamboa)