Isa pang crew ng nasunog na Motor Tanker sa Batangas natagpuang walang buhay

Kinumpirma ng Philippine Coast Guard (PCG) na isa pang crew ng nasunog ng Motor Tanker sa Batangas ang nasawi.

Dahil dito, umakyat na sa 2 ang bilang ng nasawing crew ng nasunog na Motor Tanker Sea Horse.

Dinala sa Philippine National Police – Scene of the Crime Operatives (SOCO) ang bangkay ng biktima na siya namang naghatid dito sa isang punerarya sa Barangay Natunuan Roas, San Pascual Batangas.

Hindi muna inilabas ng PCG ang pagkakakilanlan ng ikalawang biktima habang hindi pa naabisuhan ang pamilya nito.

Samantala, isa namang crew ng nasabing Motor Tanker ang nailigtas matapos mamataang palutang lutang sa katubigan na sakop ng Batangas City.

Ang survivor na si John Michael Alamansa, 26 anyos ay agad dinala sa ospital dahil nagtamo ito ng 30 to 40 percent degree burn sa kaniyang katawan.

Dalawang crew pa ng nasabing tanker ang pinaghahanap. (DDC)