Coast Guard Batangas tumutulong sa paghahanap sa nawawalang beauty queen

Tumulong ang mga tauhan ng Philippine Coast Guard Sub-Station sa Batangas City sa paghahanap sa nawawalang beauty queen na si Catherine Manguera Camilon.

Ang 26-anyos na si beauty queen ang naging pambato ng lalawigan ng Batangas sa Miss Grand Philippines competition na idinaos noong July 2023.

Noong Oct. 18, 2023, nakipag-ugnayan ang PNP Tuy, Batangas sa Coast Guard Sub-Station Batangas City para sa paghahanap kay Camilon, na isa ring public school teacher.

Ayon sa pamilya ni Camilon bumiyahe ito sakay ng Nissan Juke SUV na plakang NEI 2290, dahil mayroon itong kikitain sa Bauan, Batangas.

Ayon sa Coast Guard, ang pangalan ni Camilon maging ang sasakyan nito ay hindi nakita sa mga tinignang manipesto sa Port of Batangas simula noong Oct. 12.

Tiniyak din ng CGSS Batangas City na babantayan ang Batangas Port sa posibilidad na mamataan ang nasabing sasakyan. (DDC)