Dating empleyado ng LTO na nag-viral dahil sa road rage incident sa Bulacan, ipinatawag ng ahensya
Pinadalhan ng summon ng Land Transportation Office (LTO) ang isa nitong dating empleyado na nag-viral sa isang insidente ng road rage sa Bulacan.
Batay sa akusasyon, sangkot ang nasabing motorista sa pambu-bully ng isang delivery rider matapos magkaroon ng hindi pagkakaunawaan sa lansangan sa San Jose del Monte, Bulacan.
Ang insidente ay nakuhanan ng video at nag-viral sa social media.
Ayon kay LTO Chief Assistant Secretary Atty. Vigor Mendoza II ipinatawag ng ahensya si Gregorio Glean para humarap ito sa kanilang Central Office para sa imbestigasyon.
Sinabi ni Mendoza na agad niyang inatasan ang Regional Director ng LTO-Region 3 para magsagawa ng masusing imbestigasyon sa insidente.
Natuklasan na si Glean ay dating Job Order employee sa Driver’s Licensing and Renewal Office ng LTO sa San Jose del Monte, Bulacan. (DDC)
