4 katao patay sa sunog sa Taguig City

Hindi na nagawang makalabas ng buhay ang isang mag-iina at pinsang lalaki nang masunog ang kanilang tirahan sa Taguig City Huwebes ng madaling araw.

Natagpuan ng otoridad na magkakayakap pa ang halos natustang mga bangkay ng mag-iina na 21-anyos na ginang,13-anyos na babaeng kambal at 17-anyos na binatilyong pinsan.

Sa inisyal na ulat ng Taguig City Bureau of Fire Protection dakong alas-3:54 ng madaling araw nagsimula ang sunog sa isang bahay sa Gumamela Street Katipunan Village, Western Bicutan.

Mabilis na kumalat ang apoy sa loob ng bahay na umabot lamang sa unang alarma at naapula bandang alas-4:37 ng madaling araw.

Patuloy pang inaalam ng otoridad ang sanhi ng sunog sa lugar habang umaabot naman sa P200,000 ang halaga ng natupok na ari-arian.

Ligtas naman ang kuya ng kambal na nakitulog sa bahay ng kaibigan at nalaman nito ang nangyaring trahedya matapos siyang tawagan ng kanyang tiyahan.

Nabatid na nasa ibang bansa naman ang ama ng tahanan na isang seaman.

Dinala na sa punerarya sa Bicutan ang mga labi ng biktima para sa DNA test. (Bhelle Gamboa)’