Bisa ng special permit sa mga bus para sa Undas pinalawig ng LTFRB

Pinalawig pa ng Land Transportation Franchising and Regulatory Board (LTFRB) ang bisa ng Special Permit na ipagkakaloob sa mga Public Utility Bus (PUB) kaugnay ng paggunita ng All Saints at All Souls Day ngayong taon.

Sa Board Resolution No. 065, series of 2023, sa halip na Oct. 30 hanggang Nov. 3 ay tatagal na mula sa Oct. 20 hanggang Nov. 6, 2023 ang bisa ng Special Permit na ibibigay ng ahensya sa mga kwalipikadong pampublikong bus.

Layunin nitong matugunan ang pangangailangan ng mga commuter sa mga pampublikong sasakyan sa Undas.

Sinabi ng LTFRB na ito ay bilang tugon din sa nakatakdang pagdaraos ng Barangay at Sangguniang Kabataan Elections sa Oct. 30, 2023.

Kaugnay nito, inaabisuhan ng LTFRB ang publiko na hanggang sa Oct. 6 na lamang tatanggap ang ahensya ng aplikasyon para sa pagkuha ng Special Permit. (DDC)