LTO magtatalaga ng tauhan sa EDSA Bus Carousel

Tutulong ang Land Transportation Office (LTO) sa Metropolitan Manila Development Authority (MMDA) sa pagbabantay sa kahabaan ng EDSA Bus Carousel bunsod ng patuloy na paglabag ng mga motorista.

Iniutos ni LTO Chief Assistant Secretary Atty. Vigor Mendoza II ang deployment ng dagdag nilang mga tauhan sa EDSA Bus Carousel.

Kaugnay nito ay ipinahahanap na ni Mendoza sa LTO-National Capital Region ang operator at driver ng to taxi na hunarang sa EDSA bus carousel ng magkaroon ng pagbaha sa harapan ng Camp Aguinaldo Gate 3 sa EDSA kaya hindi nakadaan ang mga bus.

Iniimbestigahan na din ng LTO ang insidente kung saan ang isang MMDA enforcer ay muntik ng masagasaan ng motoristang tumatakas matapos mahuling dumaraan sa EDSA Bus Carousel lane.

Tiniyak ni Mendoza ang agarang aksyon upang maparusahan ang mga mahuhuling motorista na gagamit ng EDSA Bus Carousel. (DDC)