2 Vietnamese at Chinese arestado sa pagdukot sa kapwa dayuhan sa Pasay

Inaresto ng otoridad ang dalawang Vietnamese nationals at isang Chinese national matapos umanong dukutin ang babaeng Vietnamese kapalit ng malaking halaga ng pera sa Pasay City.

Ang mga suspek ay kinilalang sina Mai Ngoc Huyen, 24-anyos, Vietnamese national; Tran Duy Anh, 26-anyos; at Wang Jie, 27-anyos, Chinese national, pawang naninirahan sa 22F Gardens By The Bay Roxas Boulevard, Pasay City.

Narescue ng otoridad ang biktima na si Nguyen Thi Ly, 29-anyos, isang Vietnamese national, sa Unit 22F, Gardens by the Bay, Roxas Boulevard, Pasay City nitong Setyembre 28.

Ayon sa report, personal na nagtungo sa tanggapan ng Substation 1 ng Pasay City Police Station ang Singaporean boyfriend ng biktima na si Nicky Wang, 22-anyos, upang isumbong na hindi pa rin pinapakawalan ng mga suspek ang kanyang nobya sa naturang lugar sa kabila ng pagbabayad niya ng P900,000 na ransom money sa pamamagitan ng online transfer.

Agad nagtungo ang mga pulis kasama si Wang sa naturang condominium kung saan sa tulong ng guwardiya ay napasok ang nabanggit na unit na nagresulta ng pagkakasagip ng biktima at pagkakadakip ng mga suspek.

Batay sa pahayag ng biktima, puwersahan siyang kinuha ng mga suspek sa Ava Hotel sa Pasay City noong Setyembre 24 dakong alas-6:19 ng umaga.

Isinasailalim sa masusing imbestigasyon ang mga suspek habang sasampahan sila ng kasong kidnapoing sa Pasay Prosecutor’s Office. (Bhelle Gamboa)