Libreng serbisyong medikal isinagawa ng Las Piñas LGU
Nagsagawa ngayong Setyembre 26 ang Las Piñas City government ng libreng serbisyong medikal para sa mga residente sa lungsod.
Sa pangunguna ng City Health Office ay nagkaloob ng libreng TB screening at health services sa mga Las Piñeros sa Aguilar Sports Complex,Barangay Pilar dakong alas-8:00 ng umaga hanggang 12:00 ng tanghali.
Dumating naman sa lugar ang Lab Your Lungs van ng lokal na pamahalaan upang magkaloob ng libreng chest X-ray sa mga residente.
Bukod pa rito, nakatanggap din ang mga Las Piñeros ng libreng sugar check at cholesterol check.
Bahagi ito sa tuluy-tuloy na serbisyong pangkalusugan na handog nina Mayor Mel Aguilar at Vice Mayor April Aguilar kasama ang buong konseho ng lungsod. (Bhelle Gamboa)
