Screening officer sa NAIA na kumuha ng chocolate sa bagahe ng pasahero, sinibak sa pwesto
Sinibak sa pwesto ng Office for Transportation Security (OTS) ang isang Security Screening Officer (SSO) na nahuling kumuha ng tsokolate mula sa bagahe ng isang pasahero.
Ayon kay OTS Administrator Undersecretary Ma.O Aplasca, nangyari ang insidente noong September 13, 2023 kung saan nakita ang SSO na si Billy Boy Garcia na kumukuha ng bagay mula sa bagahe ng isang paalis na pasahero habang nagsasagawa siya ng inspeksyon.
Si Garcia ay nakatalaga sa Ninoy Aquino International Airport Terminal 2 at isang job order employee.
Ayon kay Aplasca, ang kaso ni Garcia ay isa lamang sa mga on-going cases na iniimbestigahan ng OTS bilang bahagi ng kanilang pinaigting na internal cleansing program.
Kaugnay nito hiniling ni Aplasca sa pasaherong kinuhanan ng tsokolate na makipag-ugnayan sa ahensya para maituloy ang pagsasampa ng kaso laban kay Garcia. (DDC)
