Housekeeper mula Las Piñas City nakuha na ang P61M na napanalunan niya sa lotto
Nakuha na ng isang 47-anyos na housekeeper mula Las Piñas City ang napanalunang mahigit P61 million na jackpot prize sa lotto.
Naging instant milyonaryo ang ginang makaraang manalo ng kabuuang P61,234,178 sa Lotto 6/42 noong July 1, 2023.
Ayon sa ginang, ang tinayaaan niya na winning combination na 18 – 25 – 12 – 14 – 13 – 22, ay pawang numero ng birthday ng kaniyang mga mahal sa buhay.
Halos 20 taon na din umano niyang tinatayaan ang nasabing mga numero.
Kasama ang kaniyang mister ay nagtungo sa Philippine Charity Sweepstakes Main Office (PCSO) sa Mandaluyong City ang ginang para kumbrahin ang napanalunang premyo.
Ayon sa kaniya, plano niyang magpatayo ng sariling bahay at apartment.
Magtatago din siya ng bahagi para sa kinabukasan ng kanilang mga anak. (DDC)
