2 suspek sa pamamaril sa kapitan ng barangay sa Batangas naaresto na ng pulisya

Nasa kamay na ng pulisya ang dalawang suspek sa pagpatay kay Barangay Captain Erasmo Divino Hernandez matapos masakote sa isinagawang follow-up operation ng Taal Police.

Ayon kay Major Fernando Fernando, hepe ng Taal police, hindi pa nila mapangalanan ang mga suspek habang kumakalap pa sila ng sapat na ebidensya laban sa mga ito.

Patuloy din silang isinasailalim sa masusing imbestigasyon.

Naaresto ang dalawang suspek sa Barangay Halang sa bayan ng Taal ilang oras matapos ang krimen dahil na rin sa tulong ng CCTV.

Nakuha din ng mga pulis ang ginamit na motorsiklo ng mga suspek matapos abandonahin malapit sa sabungan sa nasabing barangay.

Noong Martes ng umaga ay pinagbabaril si Kapitan Hernandez ng Barangay Poblacion Zone 10 habang nakaupo sa harap ng kanilang Barangay Hall.

Naisugod pa sa ospital si Hernandez pero binawian din ng buhay habang ginagamot sa emergency room dahil sa mga tama ng kalibre 45 baril.

Si Hernandez ay re-electionist bilang kapitan sa darating na Barangay at SK elections. (JR Narit)