Pulis patay, 2 pa sugatan sa pamamaril sa Taguig City Police Station

Patay ang isang pulis habang sugatan ang dalawa nitong kabaro kabilang ang suspek sa pamamaril sa loob mismo ng tanggapan ng Taguig City Police Station kaninang umaga.

Binawian ng buhay sa MCT Hospital ang biktima na si EMS Heriberto Saguiped, miyembro ng Philippine National Police-Special Action Force ’97, nakalataga sa Community Affairs Section (CAS) ng Taguig CPS, sanhi ng tinamong tama ng bala sa ulo.

Sugatan naman ang umawat na si
Cpl Alison Sindac at ang suspek na kinilalang si CMS Alraquib Aguel na kapwa nakatalaga din sa nasabing istasyon,dahil sa tama ng bala sa leeg.

Sa inisyal na ulat, ang pamamaril ay naganap sa loob ng tanggapan ng CAS, Taguig CPS headquarters, na nasa City Hall Compound, Gen. Luna St., Brgy. Tuktukan sa lungsod,dakong alas-11:30 ng umaga ng Agosto 7.

Dumating si Aguel sa naturang opisina at kinumpronta si Saguiped na humantong sa mainit nilang pagtatalo kaya inawat sila ni Sindac.

Dito na umano bumunot ng baril ang suspek at binaril ang dalawang biktima.

Nagawang gumanti ng putok si Sindac na ikinasugat naman ng suspek.

Sinasabing nagalit umano ang suspek sa nakahandang lutong ulam na ‘pork’ sa tanghalian na nauwi sa kamatayan ng kasamahang pulis. (Bhelle Gamboa)