Daily service interruptions ipatutupad ng Maynilad simula July 12

Magpapatupad ng daily service interruptions ang Maynilad sa mga lugar na sinusuplayan nito ng tubig sa West Zone simula sa July 12, 2023.

Ayon sa Maynilad, simula noong July 8, ibinaba na ng Metropolitan Waterworks and Sewerage System (MWSS) sa 48 cubic meters per second na lamang ang alokasyon ng tubig dahil na din sa pagbaba ng water level sa Angat Dam.

Ayon sa Maynilad, sa ngayon, limitado lamang sa gabi ang oras ng pagpapatupad ng service interruptions sa mga maaapektuhang barangay sa Caloocan, Malabon, Valenzuela, Navotas, Quezon City at Maynila.

Sa pagitan ng 7:00 ng gabi hanggang 6:00 ng umaga ang ipatutupad na service interruptions.

Ang mga apektadong customer ay pinapayuhan ng Maynilad na mag-imbak lamang ng sapat na suplay ng tubig na kanilang kailangan sa oras na walang suplay.

Magde-deploy din ang Maynilad ng mobile water tankers kung kakailanganin. (DDC)