5 crew sugatan sa nasunog na motorbanca sa Zamboanga City

Sugatan ang limang crew ng isang motorbanca matapos itong masunog habang nasa karagatan na sakop ng Brgy. Rio Hondo, Zamboanga City.

Rumesponde ang mga tauhan ng Coast Guard District Southwestern Mindanao nang masunog ang Motorbanca na “LADY RADIA” na may lulang walong crew noong gabi ng Huwebes (July 6).

Umalis ang bangka sa Brgy. Rio Hondo at patungo dapat sa Baluk-Baluk Island, Basilan Province at lulan ang 100 litro ng gasolina at iba pang essential goods.

Isa sa mga nasugatan ay nagtamo ng third-degree burns, dalawa ang nagtamo ng second-degree burns, at dalawa ang mayroong minor burns.

Agad silang dinala sa Zamboanga City Medical Center.

Pinaniniwalaang short circuit ang pinagmulan ng apoy.

Ang iba pang crew ay pawang nasa maayos na kondisyon. (DDC)