DOTr target makapag-isyu ng 1 million driver’s license card sa susunod na 2 buwan

Tiniyak ng Department of Transportation (DOTr) na agad tutugunan ang backlog sa driver’s license card matapos na makakuha na ang Land Transportation Office (LTO) ng supplier para sa 5.2 million driver’s license plastic cards.

Ayon sa inilabas na pahayag ng DOTr, nalagdaan na ang kontrata para sa nanalong bidder at nakapagpalabas na ng Notice to Proceed.

Sinabi ni Transportation Undersecretary for Administration and Finance Kim Robert De Leon, inaasahang 1 milyong plastic cards ang maide-deliver na sa susunod na dalawang buwan bilang bahagi ng first delivery ng kumpanyang Banner Plastic Card, Inc.

Dahil dito sinabi ni De Leon na inaasahang mabilis na matutugunan ang backlogs ng license cards.

Una nang pinalawig ng LTO ang validity mng driver’s licenses na napaso mula April 24 kung saan maaari pa ring magamit ang mga lisensya hanggang October 31. (DDC)