Halos 700K halaga ng shabu nakumpiska sa Cebu City
Umaabot sa halos P700,000 na halaga ng shabu ang nakumpiska ng mga otoridad ng Cebu City Police Office mula sa dalawang drug suspek na naaresto sa ikinasang buy-bust operation sa Barangay Suba, Cebu City.
Ayon kay Police Colonel Ireneo Dalogdog, inilunsad ang operasyon ng mga operatiba ng City Intelligence Unit at City Drug Enforcement Unit na pinagunahan ni Police Lieutenant Lyndon Mondragon.
Sa report ng CCPO, nakumpiska mula sa mga naarestong suspek na kinilalang sina ‘Jonas’, 41 at ‘Reinald’, 25 ang pinaghihinalaang shabu na nasa 100 gramo na may standard drug price value na P680,000, isang maroon pouch, at ang ginamit na buy-bust money.
Nakakulong na ang mga naaresto sa Custodial Facility ng CCPO habang inihahanda ang mga kaukulang dokumento para sa mga reklamong kaugnay sa iligal na droga. (DDC)
