4-storey industrial building sa Makati, nasunog
Tinupok ng apoy ang apat na palapag na industrial building sa Makati City umaga ng Miyerkules, June 14, 2023.
Sa inisyal na ulat ng Makati City Bureau of Fire Protection, nagsimula ang apoy sa ikaapat na palapag ng Burlington Industries na pagmamay-ari ng isang Ruddy Tan, sa 7375 Bakawan St., corner Lumbayao Brgy. San Antonio.
Mabilis na kumalat ang apoy sa loob ng gusali kung saan umabot na sa ikaapat na alarma ang sunog.
Nasa 20 na fire trucks ang rumesponde para apulahin ang apoy.
Tinatayang P7-milyong halaga ng mga ari-arian ang napinsala sa insidente.
Masusing iniimbestigahan ng otoridad ang sanhi ng sunog sa nabanggit na gusali. (Bhelle Gamboa)
