Barko ng US at Japan dumating na sa bansa para sa idaraos na kauna-unahang Trilateral Maritime Exercise

Nakarating na sa Pilipinas ang dalawang barko ng Japan Coast Guard (JCG) at United States Coast Guard (USCG) para sa kanilang kauna-unahang Trilateral Maritime Exercise kasama ang Philippine Coast Guard (PCG).

Sinalubong ng mga Coast Guardians ang Akitsushima (PLH-32) at USCGC Stratton (WMSL-752) sa Port Area, Maynila.

Nagsama-sama sila CG Captain Antonio Sontillanosa (Commanding Officer ng BRP Melchora Aquino), Captain Toru Imai JCG (Commanding Officer ng Akitsushima), at Captain Brian Krautler USCG (Commanding Officer ng Stratton) para pormal na simulan ang isang linggong inisiyatibo na tinatawag na “PCG-JCG-USCG KAAGAPAY TRILATERAL EXERCISE 2023.”

Kinabibilangan ito ng iba’t-ibang aktibidad na nakatutok sa mga mandato ng Coast Guard tulad ng maritime law enforcement, maritime security, maritime safety, maritime search and rescue, at marine environmental protection.

Magkakaroon din ng oportunidad ang mga kababaihan ng PCG, USCG, at JCG para pag-usapan ang mahalagang responsibilidad na kanilang ginagampanan sa pagtataguyod ng maritime law enforcement.

Nakibahagi rin sa arrival ceremony sila Embassy of Japan in the Philippines Charge d’ Affaires Kenichi Matsuda, U.S. Embassy in the Philippines Deputy Chief of Mission Heather Variava, Department of Transportation (DOTr) Undersecretary for Maritime Elmer Sarmiento, at Department of Foreign Affairs, (DFA) Office of Asian and Pacific Deputy Assistant Secretary Raphael Hermoso.

Pinangunahan naman ni PCG Officer-in-Charge, CG Vice Admiral Rolando Lizor Punzalan Jr, bilang kinatawan ni PCG Commandant, CG Admiral Artemio M Abu, ang mga kababaihan at kalalakihan ng Coast Guard sa naturang aktibidad. (DDC)