Paghigop sa natitirang langis mula sa lumubog na MT Princess Empress, inumpisahan na

Inumpisahan na ang “siphoning” o paghigop sa natitirang langis sa lumubog na MT Princess Empress sa katubigan ng Naujan, Oriental Mindoro.

Ayon sa Philippine Coast Guard (PCG), dumating sa Calapan Anchorage Area ang Dynamic Support Vessel (DSV) Fire Opal kung saan isinagawa ang boarding formalities.

Pagkatapos nito, agad na pinuntahan ng naturang barko ang operational area para simulan ang paghigop sa natitirang langis sa lumubog na motor tanker.

Ayon kay Incident Management Team-Oriental Mindoro (IMT-Ormin) Commander, CG Commodore Geronimo Tuvilla, aabutin ng 20 hanggang 30 araw ang naturang operasyon, depende sa lagay ng panahon at “subsea progress.”

Ang DSV Fire Opal ay “chartered” ng Malayan Towage and Salvage Corporation at kinontrata naman ng Protection and Indemnity Insurance Club.

Naglayag ito mula Singapore noong Mayo 19, 2023 at nakarating sa Subic Bay Freeport Zone noong Mayo 26, 2023, bago dumiretso sa katubigan ng Oriental Mindoro. (DDC)